Упраўленне па барацьбе з эканамічнымі злачынствамі зладзіла масавыя праверкі супрацоўнікаў Мазырскага нафтаперапрацоўчага завода. Прадметам цікавасці гэтай міліцэйскай структуры сталі камандзіроўкі работнікаў, паведамляе «Флагшток» са спасылкай на крыніцу, звязаную з прадпрыемствам.
Паводле інфармацыі выдання, пад падазрэнне сілавікоў трапіла каля 400 супрацоўнікаў Мазырскага НПЗ, якія здзяйснялі рабочыя паездкі за мяжу ў апошнія гады. Пры гэтым работнікам пагражаюць крымінальнымі справамі за неапраўданую растрату сродкаў завода.
«Хтосьці ездзіў абсталяванне „глядзець“, іншыя — заключаць кантракты, па розных выставах і іншых НПЗ, шышкі — у далёкае замежжа. Многія па фірмах ездзілі, якія займаюцца рамонтам. Едзе прадстаўнік завода, і не адзін, нібы для кантролю рамонту, а насамрэч — невялікі адпачынак за грошы завода», — патлумачыла крыніца.
Паводле яе, камусьці пагражае толькі штраф і кампенсацыя растрат, іншым — тэрмін і канфіскацыя маёмасці.
Афіцыйных звестак пра завядзенне крымінальных справаў і праверкі яшчэ не было, таму дакладнай інфармацыі пра сутнасць прэтэнзій АБЭЗ пакуль няма.
Нагадаем, у красавіку 2025 года на Мазырскім НПЗ затрымалі некалькіх топ-менеджараў у карупцыйнай справе, уключаючы галоўнага інжынера Сяргея Грамовіча. Пазней частку фігурантаў адпусцілі. У прыватнасці, начальнік юрыдычнай службы Ігар Драгель быў пераведзены ў статус сведкі і працягнуў працу на заводзе.
Сярод іншых фігурантаў называліся кіраўнік дырэкцыі па рэканструкцыі і развіцці Аляксандр Гуд, яго жонка Наталля Мішкова, намеснік гендырэктара па матэрыяльна-тэхнічным забяспечанні Сяргей Трунін і яшчэ некалькі супрацоўнікаў.
