Вы — вельмі смелы чалавек. Так-так, менавіта вы, той, хто чытае гэты тэкст. Нягледзячы на ўвесь жах, што адбываецца ў краіне, нягледзячы на ўсе рызыкі, вы знаходзіце ў сабе сілы чытаць сапраўдныя навіны на «Люстэрку». Сотні і тысячы людзей, якія камунікуюць з намі і дзякуючы якім мы ствараем матэрыялы, якія чытаюць мільёны, — усе вы пераадольваеце свой страх. Гэта ліст ад рэдакцыі ўсім тым, з чыёй дапамогай беларусы могуць даведвацца, што насамрэч адбываецца ў нашай краіне.
Практычна кожны дзень мы шукаем кагосьці: прызыўнікоў і дэмабілізаваных, супрацоўнікаў МНС, бацькоў ці педагогаў з прыватных школ, якія закрываюцца, і многіх іншых. І ў пераважнай большасці выпадкаў людзі адгукаюцца — нягледзячы на страх, пагрозы і бесперапынныя рэпрэсіі. Чаму? Нам здаецца, таму, што вы, як і мы, хочаце лепшага для Беларусі. А ў змроку хлусні дзяржпрапаганды гэтага дакладна няма.
Дзякуючы смелым (і не толькі на працы) ратавальнікам нам удалося даведацца, што проста цяпер нават яны не ведаюць, у якім стане знаходзяцца (і наогул — дзе геаграфічна) беларускія бамбасховішчы. І гэта на фоне таго, як усіх нас палохаюць магчымымі ракетнымі ўдарамі.
Нядаўнія тэрмінавікі расказваюць, як іх камандзіры паводзілі сябе пасля пачатку вайны ва Украіне. Адзін з нашых суразмоўцаў у дэталях апісаў, як ён і яго падраздзяленне дапамагалі мігрантам нелегальна перасякаць мяжу, у той час як Дзяржпагранкамітэт раз за разам сцвярджае, што ўсё гэта пастаноўка.
Увосень 2022-га чарговым ворагам беларускай дзяржавы сталі прыватныя школы. Іх працу ў найлепшым выпадку прыпынялі, многія былі закрытыя. Ёсць, вядома, і выключэнні — у гімназіі, дзе вучыўся Мікалай Лукашэнка, усё добра. Сярод нашых чытачоў знайшліся людзі, што пераступілі страх і расказалі нам, як у адзін дзень сотні дзяцей былі выкінутыя на вуліцу.
Дзякуючы адважнаму чалавеку з сістэмы аховы здароўя «Люстэрка» атрымала важныя звесткі пра захворвальнасць COVID-19 у Мінску. Перададзеныя дакументы дазволілі нам расказаць беларусам, як улады маніпулююць статыстыкай. Імаверна, прыклад нашай крыніцы натхніў і іншага чалавека, які даслаў нам падобную інфармацыю па Віцебскай вобласці.
Усё гэта — толькі некалькі прыкладаў таго, як людзям не ўсё роўна. Як вам не ўсё роўна. Пераважная большасць нашых суразмоўцаў знаходзіцца ўнутры краіны — і мы выдатна разумеем, як вам можа быць страшна. Дзякуючы таму, што вы насуперак страху працягваеце чытаць нас і дзяліцца з намі інфармацыяй, беларусы атрымліваюць магчымасць даведвацца сапраўдныя навіны і важныя гісторыі.
Нам, журналістам, таксама страшна. Вядома, гэта страхі іншага кшталту. На жаль, каб займацца сумленнай журналістыкай, нам давялося з’ехаць з любімай краіны. Мы перасталі баяцца сініх мікрааўтобусаў, прыпаркаваных ля нашых пад’ездаў, або супрацоўнікаў праваахоўных органаў, якія ў Беларусі гэтае права ахоўваюць наўрад ці. Але мы вельмі баімся падвесці вас — нашых чытачоў. Мы баімся, што не зможам рабіць сваю працу і ўсёпаглынальная цемра падману пераможа: ніхто не раскажа беларусам пра ману на дзяржТБ або пра жахі, якія проста цяпер чыняць сілавікі.
Працягвайце чытаць нас, працягвайце гаварыць з намі, працягвайце падтрымліваць нас на Patreon.
Як дапамагчы «Люстэрку» працягваць займацца сумленнай журналістыкай
Проста праходзьце па спасылцы і выбірайце камфортны для вас узровень падтрымкі.
Цяпер гэтая пляцоўка — адзін з самых бяспечных варыянтаў з пункту гледжання захавання прыватнасці вашага рашэння.
Як працуе Patreon? Калі вельмі проста: вы ахвяруеце аўтарам або медыя грошы, наўзамен яны даюць унікальныя бонусы. У нашым выпадку — кантэнт. Што важна: плацёж ідзе наўпрост платформе, і ў аплатных сэрвісах не адлюстроўваецца, які менавіта праект вы падтрымліваеце (там прадстаўленая велізарная колькасць крэатараў з усяго свету).
У тым ліку дзякуючы вашай дапамозе мы ні на хвіліну не спынілі працу нават у першыя дні вайны, калі пераважная частка рэдакцыі была ва Украіне, а пасля — у невядомасці ў новых для сябе краінах.
Толькі разам мы зможам перамагчы страх.