У Аляксандра Лукашэнкі няма планаў адпраўляць сваіх вайскоўцаў ваяваць ва Украіну, паведамляе яго прэс-служба. А вось апазіцыя, паводле яго словаў, пасылае беларусаў на смерць.
«Сёння крычаць: „Лукашэнка хоча паслаць ва Украіну сваіх вайскоўцаў!“ Ужо тысячу дзвесце разоў казаў, што ў мяне такіх планаў няма», — заявіў Лукашэнка.
Ён сказаў, што на смерць беларусаў пасылаюць «збеглыя».
«Гэта таксама чыесьці дзеці. Але скардзіцца няма каму. Я вас туды як прэзідэнт не пасылаў. Нам там ва Украіне рабіць няма чаго. І пасылаць ваяваць туды людзей нам няма неабходнасці. Чаму мяне ў гэтым абвінавачваюць? Таму што самі туды пасылаюць гэтых хлопцаў», — мяркуе Лукашэнка.
Нагадаем, на нарадзе па ваеннай бяспецы 4 кастрычніка ён заявіў, што Беларусь удзельнічае ў «спецыяльнай ваеннай аперацыі» ва Украіне: «Мы гэтага не хаваем. Але мы нікога не забіваем. Мы нікуды не пасылаем сваіх вайскоўцаў. Мы не парушаем сваіх абавязанняў». Паводле ягоных словаў, Беларусь «лечыць і корміць людзей», прычым не толькі расіян, але і ўкраінцаў.
Раней Аляксандр Лукашэнка не раз заяўляў пра тое, што беларуская армія ваяваць ва Украіне не будзе. Аднак раней ён і не раз заяўляў пра тое, што «ніколі з нашай тэрыторыі не будуць атакаваць Украіну». Расія пачала вайну супраць Украіны 24 лютага. Расійскія войскі ўвайшлі ва Украіну ў тым ліку і з тэрыторыі Беларусі, што зрабіла Беларусь саўдзельніцай акту ваеннай агрэсіі. Да таго ж з тэрыторыі Беларусі наносіліся ракетныя ўдары па ўкраінскіх пазіцыях — гэта прызнаваў і сам Лукашэнка.